A Autoridade Portuaria programa varias xornadas de limpeza submarina das súas dársenas
A Autoridade Portuaria de Marín e Ría de Pontevedra acometerá a próxima semana unha limpeza submarina de tres das súas dársenas. En concreto, está programada esta actuación na dársena de embarcacións deportivas (contorna do paseo Alcalde Blanco), dársena do peirao pesqueiro Sur e parque de Cantodarea e dársena de embarcacións menores na zona de Praceres. Esta actividade encádrase nas actividades do proxecto Marine Litter Style ( ML- Style) coordinado polo Centro Tecnolóxico do Mar – Fundación CETMAR, no que participa o Porto de Marín.
En días pasados levou a cabo unha inspección dos fondos destas tres localizacións por parte de mergulladores como medida previa para avaliar a densidade, tipoloxía e distribución do lixo mariño acumulado así como para planificar o traballo para realizar nas xornadas de limpeza e os recursos tanto humanos como materiais necesarios para a súa realización.
No mes de marzo, a Autoridade Portuaria xa realizara unha limpeza mariña, neste caso da lámina de auga na dársena pesqueira, coa empresa de amarre e remolque Amar Marín. En total retirouse aproximadamente un metro cúbico de material flotante, principalmente plásticos, que os ventos das últimas xornadas arrastraron ao interior do porto. O material retirado do mar foi caracterizado e separado para xestionar a parte que puidese ser valorizable, dentro dos proxectos ambientais nos que participa o porto.
