ACTUALIDADE

 Os datos estatísticos provisionais do Porto de Marín sinalan un crecemento acumulado do 17,64% nos meses de xaneiro e febreiro con respecto ao mesmo período do ano anterior. O aumento de tráfico está fundamentalmente impulsado polo incremento das descargas de graneis sólidos que acumulan un total de 238.000 toneladas, o que supón un 41% máis da cifra rexistrada en 2023. A mercadoría xeral convencional tamén sobe nos dous primeiros meses do ano, neste caso preto dun 10%. O número de buques mercantes que escalaron no porto incrementouse un 23% entre xaneiro e febreiro. Precisamente esta mañá operan en porto cinco grandes mercantes con carga e descarga de contedores, descarga de produtos siderúrxicos ,carga de pasta de papel e descargas de madeira. O total das súas operativas suman preto de 63.000 toneladas. O presidente da Autoridade Portuaria, Jose Benito Suárez Costa, sinalou que “será un primeiro trimestre de crecemento, xa que o mes de marzo está a seguir a mesma liña ascendente dos dous anteriores e esperemos poder manternos nesta liña o resto do exercicio”. Sobre as previsións para 2024, Suárez Costa manifestou que “o obxectivo é seguir aumentando en porcentaxe de mercadorías pero tamén en diversificación de tráficos”, para o que se está traballando cos operadores portuarios “para poder captar novos clientes nunha contorna cada vez máis complexo e competitivo”, manifestou.