ACTUALIDADE

O presidente da Autoridade Portuaria, Jose Benito Suárez Costa, manifestou hoxe a súa satisfacción pola decisión da Comisión de Transportes do Parlamento Europeo de incluír ao Porto de Marín na Rede Básica Ferroviaria de Mercadorías. Esta rede establece as principais infraestruturas de transporte que vertebran o territorio europeo e o Grupo Popular Europeo impulsou a revisión do Regulamento que rexe a Rede Transeuropea de Transporte para incluír varios nodos loxísticos en España, entre eles ao Porto de Marín. Os puntos incluídos nesta Rede teñen un horizonte de adaptación de ancho de vía en 2030. A decisión da Eurocámara debe ser referendada agora polo Consello Europeo. “O conseguido é un fito realmente importante que esperemos que sexa confirmado polo Consello, aproveitando ademais a presidencia española da UE prevista para o segundo semestre do ano”, sinalou Suárez Costa. Marín é líder en intermodalidad e transporte combinado buque-ferrocarril, sendo o principal porto de Galicia en utilización porcentual do tren para a distribución de mercadorías e un dos primeiros do sistema portuario estatal. En 2022, movéronse por ferrocarril preto de 400.000 toneladas de mercadoría. Entre os principais tráficos que usan este medio de transporte para a súa entrada ou saída do porto atópanse os graneis agroalimentarios, as bobinas de chapa de aceiro, a madeira ou os contedores. Neste último caso, Marín dispón da liña semanal de mercadorías máis longa de España, cun tren semanal entre os portos de Alxeciras e Marín para o transporte en contedor, tanto de carga en seco como refrixerada.