ACTUALIDADE

A UME (Unidade Militar de Emerxencias) participou en varias xornadas de formación para a proba e posta en marcha de dúas unidades de robot ROV Argus, adquiridas á empresa Omil Offshore do Porto de Marín. Trátase de robots con capacidade de operación ata 600 metros de profundidade. Estes equipos están equipados con sistema de posicionamento, soar, perfilador de fondos e magnetómetro. O obxectivo foi que os membros da UME adquirisen os coñecementos básicos para a pilotaxe do ROV, a configuración do equipo e os seus equipos auxiliares así como a extracción e interpretación dos datos que permite obter esta tecnoloxía. Os ROV Argus son deseñados e construídos en Bergen (Noruega) e a empresa Omil Offshore, situada no Porto de Marín, é distribuidora oficial destes equipos que permiten chegar a áreas de profundidade onde non pode chegar o ser humano. As súas aplicacións son moi variadas e diríxense desde a superficie de forma que o piloto pode enviar e recibir información de forma instantánea así como, grazas aos elementos manipuladores que incorpora, pódense realizar tarefas de corte, tomar mostras de auga ou sedimentos mariños, entre outras.