ACTUALIDADE

O Porto de Marín, segundo os datos estatísticos provisionais, pechou o mes de xullo cunha porcentaxe de crecemento acumulado do +0,48% con respecto ao mesmo período do ano anterior (xaneiro-xullo) e un total que supera xa os 1,3 millóns de toneladas. A mercancía xeral, tanto en formato convencional como en contedor son os grupos de mercancía que máis crecemento experimentaron neste período. En concreto, na mercancía non contenerizada hai subidas significativas de produtos como material de construción, pesca conxelada ou produtos siderometalúrxicos. Pola súa banda, no capítulo de graneis sólidos, crece o apartado de cereais e as súas fariñas, que superan nun 14,8% as importacións do pasado exercicio ata a data. En canto ao número de buques, entre xaneiro e xullo deste ano chegaron a porto un 23% máis de mercantes que no mesmo período do pasado exercicio.