ACTUALIDADE

O Porto de Marín, a través de Benito Calviño, Xefe de División de Sustentabilidade da Autoridade Portuaria, expuxo onte no edificio Redeiras de Vigo a ampla experiencia do porto na xestión circular de residuos, en particular das artes de pesca e aparellos. Fíxoo no marco da presentación do proxecto PESCRAP, apoiado pola Fundación Biodiversidade do Ministerio para a Transición Ecolóxica e desenvolvido en colaboración con AIMPLAS (Instituto Tecnolóxico do Plástico), Asociación Vertidos Cero e o Post-Growth Innovation Lab da Universidade de Vigo, un grupo internacional e interdisciplinar co obxectivo de investigar vías de desenvolvemento sostible. O proxecto pretende asentar as bases técnicas, económicas e organizativas para a creación dun Sistema de Responsabilidade Ampliada do Produto (RAP) nacional específico para aparellos e artes de pesca e acuicultura ao cabo da súa vida útil. A xornada desenvolveuse a través de dúas mesas de diálogo. En concreto, o Porto de Marín participou na mesa “Actores locais e Gobernanza do Ecosistema Mariño”, xunto a representantes da Federación Española de Confrarías, Fundamar e Cetmar. A Autoridade Portuaria explicou a súa longa traxectoria como porto pioneiro na retirada selectiva de residuos e na súa reciclaxe e reutilización.