ACTUALIDADE

Ata catro grandes buques frigoríficos están a operar estes días no Porto de Marín para descargar preto de 3.000 toneladas de peixe conxelado no porto. Trátase do Igueldo que opera no Peirao Transversal Manuel Leirós, o CFL Hunter no Peirao da Zona de Expansión Este, e os arrastreiros Monteferro e Montelourido, que descargan nas atracadas do Peirao Comercial Sur 1 e 2. Os catro proceden do porto uruguaio de Montevideo e posúen bandeira das Illas Falkland. En concreto, o Igueldo é un buque construído en 1989 que conta cunha eslora de 84 metros e 2305 GT. No que respecta ao CFL Hunter, cunha eslora de 59 metros e 1580 GT, data do 2017. Para rematar, tamén en 2017 foron construídos os arrastreiros Monteferro e Montelourido, ambos cunha eslora de case 65 metros e 1500 GT e ambos os construídos no estaleiro de Nodosa, no propio Porto de Marín. Ao longo do 2025, o Porto de Marín moveu máis de 130.000 toneladas de pesca conxelada nas súas diferentes presentacións. O porto é un gran centro loxístico de recepción, elaboración e distribución de pesca conxelada e as empresas que se dedican a esta actividade no recinto son un dos grandes motores económicos da comarca polo seu potencial para xerar emprego na zona. Ademais, as súas instalacións están altamente especializadas en atender tráficos de conxelado, nun recinto que conta con máis de 70.000 metros cadrados en concesión destinados á actividade frigorífica e unha capacidade de almacenamento refrixerado conxunta superior aos 260.000 metros cúbicos.